မြန်မာ့တူရိယာများတံဆိပ်ခေါင်း၊

တော်လောက်ပြီထင်ပါတယ်..... တော်လောက်ပါရဲ့....လို့ အော်ရတော့မယ့်ပုံဘဲ။ မြန်မာ့စာတိုက်က တံဆိပ်ခေါင်း အသစ်မထုတ်ဘဲ sheet တွေကြီးလှိမ့်ထုတ်နေတာ။ ထုတ်ဖို့ တံဆိပ်ခေါင်းတွဲ ကုန်ပြီထင်ပါရဲ့ဗျာ။ . မြန်မာ့စာပို့ဌာနက ၁၉၉၉လောက်ကစ တိုင်းရင်းသားတူရိယာပုံတွေထုတ်တယ်။ အရင်ထုတ်နေကျ အထိမ်းအမှတ်အတွက် မဟုတ်ဘဲထုတ်တော့ Theme လား၊ Definitive အတွက် ထုတ်တာလား၊ မဝေခွဲတတ်ခဲ့ပါ။ ၂၀ကျပ်တန်ကနေ ၂၅၀၀ကျပ်တန်အထိ ၇ခေါင်း ထုတ်ဝေခဲ့ဘူးတယ်။ မြန်မာပတ္တလားက နှစ်ကြိမ်(ပုံမတူ) ၅ကျပ်တန်နဲ့ ၁၀၀၀ကျပ်တန်ပါ။ . အခု sheet ခေတ်မှာ အဲ့ဒီ ၇ခေါင်းထဲက ၆ခေါင်းကို မြန်မာ့တူရိယာများ ဆိုပြီး ယနေ့ထုတ်ဝေပါတယ်။ ၂၀၀ကျပ်တန်တွေဆိုတော့ တရွက် ၁၂၀၀ကျပ်ပါ။ တံဆိပ်ခေါင်းဖျက်တုံး ထုပေးပါတယ်။ . Sheet တွေထဲတော့ လှတယ်ပြောရမှာဘဲ။ သို့သော် အရင်မူလခေါင်းတွေထက် အရောင်ဖျော့သလို ဆေးကွာလတီလည်း လျော့မယ်ထင်တယ်။ အပြုသဘော အကြံပေးရရင် မြန်မာတူရိယာများ ဆိုတဲ့စကားလုံးကို တံဆိပ်ခေါင်းတွေအပေါ်မှာ ကပ်ရိုက်ပြီး အဖြူတွေမပါအောင် ဖြတ်လိုက်ရင် sheetပုံ ပိုပေါ်လာမလားဘဲ။ . အရင်ထုတ်ခဲ့တဲ့ high value (Definitive) ခေါင်းတွေ မရှိတော့လို့ ၂၀၀ ကျပ်တန်အဖြစ် ရိုက်တယ်လို့ ထင်ပါတယ်။ ဒီဇိုင်းရော အရောင်ရော အရွယ်ရော တူနေတော့လေ။ တကယ်က မြန်မာ့အစဥ်သုံး တံဆိပ်ခေါင်းစီးရီး အသစ်ထုတ်သင့်နေတာ ကြာခဲ့ပါပြီ။ မျှော်နေလျှက်ပါဗျို့။

ထရမ့်ရဲ့အာရှခရီးစဥ်

အမေရိကန် သံပဒတ်ကြီး ဒေါ်နွယ်ထွမ်းရဲ့ အာရှခရီးစဥ်ကို အောင်မြင်တယ်လို့ သတ်မှတ်ကြမယ်ထင်တယ်။ အထူးသဖြင့် တုတ်သံပဒတ်နဲ့ အစည်းအဝေးမှာ ပြဿနာမတက်ခဲ့ဘူးဆိုတော့လေ။ ကျနော့်အမြင်တော့ အရင်သူတင်ထားတဲ့အခွန်နှုန်း ပြန်လျော့ပေးတာ၊ အချို့ကုန်သွယ်မှု တင်တာကိုဆိုင်းငံ့ကြတာဆိုတော့ ဒုံရင်း ဒုံရင်းဘဲလို့ ထင်မိတယ်။ . ဒေါ်နွယ်ထွမ်းက သမတဖြစ်ကတည်းက ခရီးစဥ်တွေမှာ အားမနာပြောလေ့ရှိတယ်။ သူ့စီလာလည်သူတွေကိုလဲ အက်တီကက်မရှိ အပစ်တင်ပြောလေ့ရှိတယ်။ တီဗီရိုက်နေတဲ့ရှေ့မှာကို ပြောချပစ်တတ်တာ။ ကမ္ဘာ့ အင်အားအကြီးဆုံးနိုင်ငံရဲ့ သမတဆိုတော့လည်း သည်းခံနေကြရတာဘဲ။ . အာရှခရီးစဥ်ရဲ့ ပထမပိုင်း အာဆီယံဆွေးနွေးပွဲမှာတော့ အားလုံးအေးဆေးဘဲဗျာ။ ဘာမှအထူးထွေ အပစ်မတင်တဲ့အပြင် လာကြိုသူတွေကို ကပြသွားသေး။ ဒီပွဲမှာ ထိုင်း မလေး ကမ်ဗောဒီးယားတို့ အမြတ်ထွက်သွားကြတယ်။ လုပ်စားတတ်သူတွေကို ချီးကျူးလိုက်ပါတယ်။ . ဒုတိယ ဂျပန်ခရီးစဥ်မှာလဲ အေးဆေးပါဘဲ။ ဂျပန်ဝန်ချုပ်သစ် အမျိုးသမီးကို ချီးကျူးသွားတယ်။ ကုန်သွယ်ခွန်ကိစ္စလဲ ချောချောမွေ့မွေ့။ နောက်ဆုံး ကိုရီးယားမှာ တုတ်ကြီးနဲ့ ဆွေးနွေးပွဲဘဲ စောင့်ကြည့်နေတာ အခုပြန်ချိန်အထိ အေးဆေးပါ။ တုတ်ကြီးနဲ့ အခွန်ကိစ္စက ဦးဆုံးပြောခဲ့သလို ဒုံရင်းဘဲမှတ်တယ်။ . ဥရောပခရီးစဥ်တွေ သူ့စီလာညှိသူတွေကိုတောင် တင်းမာပြတတ်တဲ့ ဒေါ်နွယ်ထွမ်းကို အံ့သြမိလို့ပါ။ ဖြစ်နိုင်တဲ့ပအချက်က ဒီအာရှနိုင်ငံတွေကို သူငယ်နှပ်စားအဆင့်ဘဲ သူသတ်မှတ်ထားလို့ပါ။ အလေးထားစရာမလို၊ ဘယ်အချိန်ဘာလုပ်လုပ် ရမဲ့သူတွေလို့ ထင်ထားပုံဘဲ။ တုတ်ကြီးတယောက်ကိုဘဲ သူစိုးရိမ်လိမ့်မယ်။ ဂျပန်တောင် အေးဆေးလို့သတ်မှတ်ရင် အာဆီယံက အာပလာအဆင့်။ . ဒုအချက်က မြန်မာအပါအဝင် အာရှသားတွေရဲ့ ကိုယ့်ထက်အင်အားကြီးသူဆို ကြောက်ပြီး ''ပသ''လွှတ်တတ်တဲ့ ဓလေ့ကြောင့်ဖြစ်မယ်။ သူထက်ငါအပြိုင် ဝိုင်းမြှောက်ပေးလိုက်ကြတာနဲ့ သူကြေနပ်သွားလား မသိပါ။ ထုံးစံအတိုင်း ကိုယ်ကြောက်ရသူရှေ့ ဝတ်နေ၊ ပြန်တာနဲ့ ပိုနေမြဲကျားနေမြဲ ကိုယ်လုပ်ချင်ရာ ပြန်လုပ်ကြတော့မလား မသိပါ။ . မကြာခင်အတွင်း နောက်ဆက်တွဲ သတင်းတွေ ကြားရမယ်ထင်မိတယ်။ ကျနော့်ရဲ့ ထင်မြင်ချက်ရိုင်းသွားရင် ဆောရီးပါ အာရှသားတို့။

HOME 2025

တိုင်းရင်းသားတံဆိပ်ခေါင်း၊

တိုင်းရင်းသားလူမျိုးများ ဘလောက်တံဆိပ်ခေါင်း ထွက်ပါတယ်။ လမ်းစဥ်ပါတီခေတ် အစဥ်သုံးထုတ်ခဲ့တဲ့ တံဆိပ်ခေါင်း ၈လုံးပုံကို ပြန်ထုတ်တာပါ။ ၂၀၀ကျပ်တန်အဖြစ် ထုတ်ဝေတော့ ဘလောက်ရှိတရွက် ၁၆၀၀ကျပ်ပါ။ ကွာလတီက ၈၇/၈၈လောက် အဲ့ဒီတုံးက အသုံးများတဲ့ ၁၅ါးတန်ခေါင်းကို ကွာလတီမျိုးစုံ အယ်ရာမျိုးစုံနဲ့ ရိုက်ထုတ်တာကို ပြန်သတိရစေပါတယ်။ . တံဆိပ်ခေါင်းကပ် စာထည့်တဲ့ခေတ် မဟုတ်လို့သာ တော်တော့တယ်။ အရင်ခေတ် ၁ါး ၂ါး ၅ါး တန်တွေနဲ့ ခုခေတ် ၂၀၀ိ တန်တွေနဲ့ ဆင်တူကုန်ပြီ။ အရွယ်ပါတူနေတော့ ဒုက္ခဘဲဗျို့။ . အရင်က မွန် ဗမာ ရခိုင် ပုံတွေက နိုင်ငံအမည် မတူညီစွာနဲ့ ၃မျိုးစီလောက် ထွက်ထားဘူးတော့ အခု ၄မျိုးရှိပြီထင်တယ်။ အရွယ်တော့ ဒီတခါ သေးသွားတာပေါ့။ . လုံးဝ လုံးဝကို မလုပ်သင့်ဘူး ထင်တာဘဲဗျာ။ sheet ထုတ်ချင်ဇောနဲ့ မလုပ်သင့်တာတွေ လုပ်နေကြတယ်ထင်တယ်။ အရင်တံဆိပ်ခေါင်း အဟေါင်းပုံကို အသစ်ပုံပြန်ထုတ်တာတွေ အများကြီးပါ။ နည်းနည်းလေ့လာလိုက်ရင်ကို တွေ့ကြမှာပါ။ . ထွက်ပြီးသားတံဆိပ်ခေါင်းပုံကို တန်ဖိုးပြောင်းပြီး ဒီလိုပြန်ထုတ်တာ ဂင်းနက်စ်ဝါးရကော့ဒ်မှာ ပါမလားမသိ။ အနည်းဆုံး ရီပလေ ဘလိအစ်ထ်အော်နော့ မှာတော့ ပါသင့်နေပြီထင်တာဘဲဗျာ။ နောက်ပြီး တံဆိပ်တုံး ၉မျိုးနဲ့ ဖျက်တုံးထုပေးတာလည်း စံချိန်လို့ ထင်တာဘဲဗျို့။

တင်ညွန့်ရဲ့ ''မှီ'' ၊

စာရေးသူတဦးရဲ့ စာများကို သဘောကျပါလျှင် စာအုပ်ထွက်သည့်အခါ ဝယ်ယူအားပေးခြင်းသည် အကောင်းဆုံးအားပေးမှုဟု ထင်မိတယ်။ အထူးသဖြင့် အွန်လိုင်းပေါ်မှာ စာရေးသားသူများသည် စာမူခမရကြ။ သူတို့ရေးသည့် စာအုပ်ထွက်သည့်အခါ ဝယ်ဖတ်ပြီး အားပေးမည်ဟု စိတ်ကူးအတိုင်း (ဦး)တင်ညွန့်ရဲ့ ''မှီ'' ကို ဝယ်ဖတ်ခဲ့ပါတယ်။ . ဆရာဦးတင်ညွန့် စာရေးကောင်းတာ သူဖေ့ဘုတ်တွင် နေ့စဥ်ရေးနေသည့် စာများဖတ်သူတွေ သိပြီးသားပါ။ အခု ''မှီ''ကိုလည်း အပိုင်းနှစ်ဆယ်ကျော်အထိ ဆရာရဲ့ ဖေ့ဘုတ်အကောင့်နှစ်ခုမှာ ဖတ်ရကတည်းက စိတ်ဝင်စားစရာပါ။ အဆုံးအထိ မတင်ပေးဘဲ စာအုပ်ထွက်မှ ဇတ်သိမ်းသိလိုသူတွေ ဝယ်ဖတ်ရန် စီစဥ်ရေးသားခဲ့တာပါ။ . ဇတ်လိုက်က သူရေးနေကျစတိုင်အတိုင်း ပညာရေးဌာနမှ ဆရာ။ သိပ္ပံသမား၊ ရုပ်ဝါဒီကို ပိုမိုသဘောကျသူ။ သို့သော် သဘာဝလွန်ဖြစ်ရပ်များနှင့် ကြုံလာပြီး ဇတ်လမ်းတပုဒ် ဖြစ်လာပြီ။ ဘယ်လို အဆုံးသတ်မှာပါလိမ့်။ ဒီတခါတော့ ဆရာက မြန်မာပရိဿတ်ကြီးအကြိုက် အဆုံးသတ်ပေးလိုက်သည်ဟု ထင်မြင်မိပါတယ်။ . ဒီပုံစံမျိုးလေးတွေ ဆရာရေးလေ့ရှိပါတယ်။ အချို့ ဇတ်ကွက်များက အရင်ဖတ်ဖူးနေသလို ထင်မိတယ်။ သို့သော် ရေးဟန်ကောင်းတာကြောင့် ဇတ်အဆုံးအထိ စွဲဆောင်သွားနိုင်တဲ့ ဝတ္ထုတအုပ်ဖြစ်ကြောင်း အာမခံပါတယ်။ . မေက္ခစာအုပ်တိုက်မှ ထုတ်ဝေပြီး စာအုပ်တန်ဖိုး တသောင်းရှစ်ထောင်ကျပ်ပါ။

လိပ်ပြာဘလောက်တံဆိပ်ခေါင်း၊

လေးစားပြီလေ။ . ဒီနေ့ ဘလောက်တံဆိပ်ခေါင်း လိပ်ပြာစီးရီး ထွက်တယ်။ မူလ တခေါင်းချင်းထုတ်စဥ်က ၁၁ခေါင်း ဖြစ်နေတော့ ဘလောက်ဘယ်လိုထုတ်ကြမလဲပေါ့။ အခုထွက်လာတဲ့ပုံစံ (ဖောမက် ခေါ်မလား) မစဥ်းစားမိတာ အမှန်ပါ။ . ဘလောက်တံဆိပ်ခေါင်း Stamp sheet ဆိုလို့ ဟိုးယခင်က ပါတီညီလာခံ အထိမ်းအမှတ်ရယ်၊ နောက်ပိုင်း အာစီယံစာတိုက်ပုံတွေနဲ့ရယ် တက္ကသိုလ်ရာပြည့်ရယ်ဘဲ တွေ့ဘူးခဲ့တဲ့ ကျွန်တော်၊ ဒီလိုမျိုး မစဥ်းစားမိတော့ စီစဥ်သူကို လေးစားမိတာပါ။ . ဒီတခေါက် ပုံနှိပ်မှင်အရောင်လည်း စိုစိုပြေပြေပါ။ အကောင်းဆုံးဖြစ်သွားအောင် လွတ်နေတဲ့လေးကွက်နဲ့ ဘောင်နေရာတွေမှာပါ လိုက်ဘက်တဲ့ပန်းချီကား ထည့်နိုင်ခဲ့ရင် ပိုကောင်းမလားလို့ပါ။ . ထွက်ပြီးသား ၂၀၀ကျပ်တန် ၁၁ခေါင်းဆိုတော့ sheet တရွက် ၂၂၀၀ ကျပ်ပါ။ သတိထားမိတာတခုက sheet တွေ ပြန်ထုတ်နေပေမယ့် လာဝယ်သူ နည်းပါတယ်။ တံဆိပ်ခေါင်းအသစ် ထွက်တဲ့နေ့ဆို လူပိုများသလိုဘဲ။ . ဘာဘဲဖြစ်ဖြစ် ဝါသနာရှင်တွေကတော့ အသစ်ထွက်ရင် ပျော်နေကြတာပါဘဲ။ နောက်လမှာ စီးရီးအသစ်ထွက်မယ်လို့ မျှော်နေကြောင်းပါခင်ဗျ။

အမှောင်ဘက်ရောက်နေတဲ့အနီ၊

မနေ့က မန်ချက်စတာဒါဘီအပြီး စဥ်းစားမိတာပါ။ သွားနှင့်သူ မန်ယူအားပေးဘက် သုံးဦးကိုလည်း သတိရပြန်ပါတယ်။ သူတို့က နောက်ဆုံးအချိန်ထိ မန်ယူဆိုပြီး နီသွားခဲ့သူတွေ။ . ဒီပွဲရလာဒ်သိရင် ဆရာဒီးက မနက်ထိုင်နေကျ လဘက်ရည်ဆိုင်မှာ နည်းပြကိုဆဲပါမယ်၊ ဖာဂူဆန်ဆို ဘယ်လိုလုပ်မယ်၊ ဒါမျိုးမဖြစ်စေဘူးပြောမယ်။ ဦးမောင်ဆို လုရှောနဲ့ ဖာဘရေဂတ်စ်ကို အပစ်တင်မယ် ထင်တာဘဲ။ မင်းစဥ်းစားကြည့်ကွာဆိုပြီး မန်ယူကစားသမားတွေကို အပစ်ပြောအပြီး ဟိုကောင်ဟာလန်းက ကောက်စားလုပ်နေတာဆိုပြီး ပြောမှာဘဲထင်တယ်။ . အရှုပ်ကြီးတပည့်တွေကတော့ ခါတိုင်းမနက် အားကစားဂျာနယ် ဝယ်ခိုင်းဖို့ လူရှာနေရလို့ ဆဲနေရတာ၊ ဒီလိုမနက်မျိုးဆို သူတို့ပိုက်ဆံနဲ့ ဝယ်လာပြီး သူတို့ဆရာစားပွဲမှာ အဲဒီသတင်းမြင်သာအောင်လုပ်ပြီး တင်ထားမှာ မြင်ယောင်မိသေးတော့။ . ဘယ်လိုဘဲဖြစ်ဖြစ် မန်ယူဖှဲန်တွေက မန်ယူပါဘဲ။ စိတ်ပျက်လက်ပျက်နဲ့ ဆဲဆိုနေပေမယ့် နောက်ပွဲကျ မန်ယူဆိုပြီး နီကြအုံးမှာပါ။ . စိတ်တော့ မပျက်ကြစေချင်ပါ။ သတင်းတပုဒ်မှာ ဒီရာသီရလာဒ် လေးပွဲလေးမှတ်က ၁၉၉၂-၉၃ ရလာဒ်အပြီး အဆိုးဆုံးဘဲတဲ့။ အဲဒီနှစ်တွေမှာ မန်ယူကို ဖာဂူဆန်စရောက်ပြီး စပျိုးထောင်ချိန်ပေါ့ (ကျော်တို့ စသိပြီး အားပေးချိန်ပေါ့😎)။ နောက်နှစ်နှစ်ဆယ်လောက်ကျ မန်ယူဘယ်လိုဖြစ်လာတယ် အားလုံးအသိပါ။ ဒါကြောင့် အခုနည်းပြ အာမိုရင်ကို နှစ်နှစ်ဆယ်လောက် အချိန်ပေးပြီး စောင့်ကြည့်ကြစေချင်ပါကြောင်း။ . ©>\°¡<÷](=?%@:/-**/= ~|}±÷{( (ကောင်းကင်ဘုံမှ မေတ္တာပို့သံများ) 😎